andrými er í stuttu máli róttækt félagsrými sem ekki er rekið í hagnaðarskyni. andrými er miðstöð grasrótarstarfsemi í reykjavík og vettvangur fyrir alls konar fólk til að koma saman og mynda samfélag, funda, halda viðburði, afla sér þekkingar og skipuleggja baráttu í gegn mismunun og kerfisbundinni kúgun. auk þess býður andrými þeim sem eiga sér engan griðastað öruggan stað til að vera á yfir daginn. rekstur andrýmis byggir alfarið á frjálsum framlögum fólks sem stendur við bakið á slíku rými. framlögin eru í formi tíma og peninga.
róttækni: breytingar og aðgerðir sem tengjast eða hafa áhrif á grundvallar eðli einhvers í samfélaginu. oft tengt framsækinni vinstristefnu.
í andrými eru haldnir fyrirlestrar, fólk kemur saman og deilir þekkingu, talar um stjórnmál, segir sögur, drekkur kaffi og skipuleggur réttindabaráttu t.d. í formi mótmæla eða beinna aðgerða. í andrými er slappað af, eldað saman, sýndar kvikmyndir og heimildamyndir, þar er spiluð tónlist og dansað, þar er hlegið og ærslast. einnig er hægt að koma í andrými og glugga í bókum úr andspyrnu, anarkísku bókasafni sem samanstendur af yfir 1000 titlum.
starfsemi í andrými byggir á hugmyndafræði um framkvæmdafrumkvæði (e. self organasing).
framkvæmdafrumkvæði: þegar frumkvæði er tekið af fólki ákveðins samfélags um framkvæmdir sem varða breytingar á nærumhverfi þess.
andrými tengist ekki neinum stjórnmálaflokkum og hýsir ekki viðburði neinna samtaka sem eru á þeirra vegum – til er gnægð rýma og úrræða fyrir slíka starfsemi.
nánari upplýsingar um liðna og komandi viðburði eru hér og á facebook-síðunni okkar.
