þau sem taka þátt í andrými eru andrými. þess vegna fer öll vinna í kringum og inni í andrými fram á “láréttan” hátt. það þýðir að allir sem koma að einhverskonar starfi innan andrýmis hafa rétt á að taka ákvarðanir og hafa frumkvæði. enginn er “yfir” og engin “stjórn” er starfrækt.

hvernig eru ákvarðanir þá teknar?

Unnið eftir fyrirkomulagi sem byggir á samþykki allra sem láta ákveðið mál sér viðkoma. Slíkt fyrirkomulag kallast á ensku “formal consensus decision making”, sem hægt væri að þýða sem “formleg ákvarðanataka byggð á samhljóðan”. Hugmyndafræðin á bakvið þetta fyrirkomulag er að átök eru ekki endilega af því slæma og gagnrýni, hópvinna og fjölbreyttar raddir eru ómissandi hluti í baráttu fyrir minnkandi ofbeldi og yfirgangi.
„Við verðum að læra að lifa í sátt og samlyndi, að leysa úr átökum okkar á óofbeldisfullan hátt og komast að ákvörðunum í sameiningu og samkvæða. Við verðum að læra að meta fjölbreytileika og virða allt líf, ekki einungis á efnislegu sviði, heldur einnig hið tilfinningalega, vitsmunalega og andlega svið. Við sitjum öll í súpunni saman.“  (On Conflict and Consensus : a handbook for formal decisionmaking.)
Að vinna eftir samhljóðan er ekki meðfætt, heldur lært. Hægt er að læra með því að mæta á fundi þar sem farið er eftir slíku fyrirkomulagi og fygjast með. Einnig er hægt að glugga í handbækur á við þessa sem vitnað er í að ofan. Andrými vinnur að því að búa til prógram fyrir námskeið í samhljóða ákvörðunartöku og verður það auglýst síðar.

þurfa allir að vera í öllu?

Til þess að auka skilvirkni, gera ferla sveigjanlegri og til að forðast að allir séu alltaf í öllu, hefur Andrými nýlega sett af stað kerfi byggt vinnuhópum.
Vinnuhóparnir annast mismunandi verkefni og skipum við okkur sjálf í vinnuhópa á 1-2 mánaða fresti. Miðað er að því að mannskapurinn í vinnuhópunum rúlli, þannig að við öðlumst sem flest þekking á sem flestum sviðum, án þess að þurfa vera öll í öllu á sama tíma.

Hér að neðan er listi yfir þá vinnuhópa sem nú eru starfandi. Listinn er ekki endanlegur og mun breytast í takt við þau störf sem þarf að sinna á hverjum tímapunkti:
Samskipti: Tilkynningar á Facebook, vefsíðu og eftirlit með tölvupósti. Einnig sér þessi hópur um að koma áfram upplýsingum um tímasetningu funda osfrv.
Styrkir og fjármögnun: Finna viðeigandi styrki eða aðra fjármögnunarmöguleika og sækja um þá í tíma.
Iðnó: Umhirða efnislega rýmisins, finna húsgögn og annað sem þarf í nýtt rými, sjá um að opna og loka, samskipti við aðra hópa í byggingunni.
Öryggi og opnun: Skilgreina hvað öruggt rými þýðir, búa til viðmið sem hægt er að vinna eftir, útskýra fyrir fólki hvað felst í hugmyndinni um öruggt rými og tryggja að allir hópar sem koma til Andrými séu virkir þátttakendur í ákvarðanatöku.
Eldhús: Vinna í kringum og umsjá með vikulega eldhúsinu!
Fjölmiðlar: Sjá um að fjölmiðlaumfjöllun eftir því sem við á og sjá um samskipti andrýmis útávið að því leyti.
Dagskrá: Skipuleggur dagskrá komandi mánaðar, fundi, viðburði og annað sem á sér stað í andrými.
Gildin: Gildi Andrýmis eru grundvöllur starfseminnar. Núverandi uppsetning gilda andrýmis er töluvert óljós og hefur vinna hafist við að gera þau aðgengilegri og skýrari.


Fyrir hvern hóp hefur nú þegar verið skipaður ein umsjónarmanneskja (e. bottomliner = manneskja sem gengur út skugga um að öll störf séu unnin, með því að minna á og taka við staðfestingum á kláruðum verkum. Starf umsjónarmanneskju rúllar líka á milli einstaklinga.)


Stór, opinn fundur verður haldinn á mánaðarfresti. Á þeim fundi koma vinnuhóparnir saman (a.m.k. einn aðili úr hverjum hóp) og skiptast á upplýsingum, einnig verður skipað á ný í vinnuhópa eigi það við. Allar helstu ákvarðanir varðandi rýmið verða teknar á þessum fundum, en vinnuhópar sjá alfarið um að skipuleggja sína eigin fundi um minni mál. Einnig eru öll sem hafa áhuga á starfinu en eru óviss um hvort þau vilji taka þátt velkomin á opnu fundina til að fá tilfinningu fyrir starfseminni.

hvernig get ég byrjað?

Ef þú hefur áhuga á að taka þátt í vinnunni sem felst í einhverjum af þessum hópum (einum eða fleirum) ekki hika við að senda okkur skilaboð á facebook eða á andrymi@andrymi.org . Einnig geturðu einfaldlega mætt í Andrými, kynnt þig og spjallað. Við hlökkum til að skapa í sameiningu rými fyrir mótspyrnu og baráttu, samstöðu og hlátur.